Paj huam muaj npe: nco tus qub hlub

Paj huam muaj npe: nco tus qub hlub
Nco nco tus qub hlub



Kaj ntug txoog nas noog pib quaj
hnub tawm tuaj ci vus tim roob
nco nkauj hmoob lub siab quaj dhi
ncaim ntau hli koj dua twg lawm
nco nco tawm plaws lub kuag muag
kuv xav tuag thaum nco txog koj
saib mi nroj mi tsuag txawv txhua
tsa suab nqua tsis hnov koj teb
mus nyob deb rau sab ntuj twg
mi phooj ywg tus neeg kuv hlub
nco thaum ub wb nyob ua ke
tsawg txoj ke los wb mus taug
muaj ntau zaug kuv tseem npau suav
pom koj tuav rawv kuv txhais tes
tsim dheev ces kua muag poob ntav
yeej tsis xav nyob ua neeg li
siab quaj dhi mov tsis xav noj
haus dej zoj los tsis poob plab
xav ua dab ua ntxoog mus nrhiav
tshuav txoj siav tseem tsis tau tu
nco lub plhu dawb mos nyuj nyoos
ua yog toog pom koj tas li
hais lus ntxhi tuj taws ib sab
tsawv nkaus npab los tsis hnov nphav
siab poob ntav tsim dheev los quaj
mus muab tshuaj noj los tsis qaug
muab cawv haus los tsis hnov huam
mi leej muam tus neeg kuv nco
ib ziag no koj nyob li cas
muab hais mas ntxim tu siab heev 
ntshe yuav teev tsis taus kua muag
ntshe yog luag tus lawm xwb lauj
sim hluas nkauj daj dee tsis tau 
ces yuav npau mus tas sim neej
ntshe yuav pheej niaj hnub seev txog
ncauj tsis qos thiab npliag tsis qhuav
ces yuav tuav rawv koj daim duab
tsis hnov suab los tsuav yog pom
muab los tsom koj tus plaj plhu
ntshe yuav tu tu kuv lub siab os hmoob.................

nco tus qub hlub - i miss you
Paj huam muaj npe: nco tus qub hlub